Mbledhje plenare e Konsorciumit Ndërkombëtar

Konsorciumi Ndërkombëtar, grupi bashkërendues që përfshin ambasada, misione ndërkombëtare dhe organizata joqeveritare që ofrojnë asistencë në fushën e zbatimit të ligjit dhe shtetit të së drejtës në Shqipëri, organizoi takimin e përvitshëm më 19 prill 2011 me temë "Adresimi i rekomandimeve të Opinionit të Komisionit Evropian për Shqipërinë". Ministri i Drejtësisë, Bujar Nishani, Ministri i Brendshëm në detyrë, Avenir Peka dhe Prokurorja e Përgjithshme, Ina Rama, falënderuan Konsorciumin Ndërkombëtar për kontributin e dhënë për promovimin e shtetit të së drejtës në Shqipëri, nënvizuan rëndësinë e angazhimit të vazhdueshëm të Konsorciumit Ndërkombëtar për të përmirësuar efektshmërinë e asistencës ndërkombëtare në fushën e drejtësisë dhe çështjeve të brendshme dhe rikonfirmuan bashkëpunimin e tyre. Ambasadori i SHBA-së, Alexander A. Arvizu, Kryetari i Delegacionit të BE-së, Ambasadori Ettore Sequi dhe Kryetari i Prezencës së OSBE-së në Shqipëri, Ambasadori Eugen Wollfarth nënvizuan së donatorët po ndihmojnë Shqipërinë me ndërtimin, rikonstruktimin dhe pajisjen e godinave gjyqësore, penitenciare e policore, me investimin në njerëz përmes programeve të trajnimit, forcimit të kapaciteteve dhe asistencës në teknologji informacioni, me qëllim rritjen e transparencës dhe përgjegjshmërisë së autoriteteve në këtë sektor. Ata nënvizuan rëndësinë e asistencës së donatorëve dhe theksuan përgjegjësinë e qeverisë shqiptare për ta përdorur këtë asistencë në mënyrën e duhur. Gjithashtu, pohuan angazhimin e tyre për zbatimin e masave dhe programeve konkrete për të përmirësuar sektorin e drejtësisë në Shqipëri. Ministri Nishani, Ministri në detyrë Peka dhe Prokurorja e Përgjithshme Rama, paraqiten një tablo të zhvillimeve, nismave dhe sfidave të sektorin, duke vënë në pah rolin e rëndësishëm të reformave të këtij sektori në përgatitjen e Shqipërisë për anëtarësim në BE. Ata theksuan se qeveria është e angazhuar që të vazhdojë të jetë partner serioz në të gjitha projektet e donatorëve që kontribuojnë në forcimin e agjencive të zbatimit të ligjit në Shqipëri. Drejtori i Përgjithshëm i Policisë së Shtetit, Hysni Burgaj, vuri në dukje që qeveria ka hartuar dhe ka miratuar një plan veprimi për zbatimin efiçent të 12 rekomandimeve të KE-së. Ai shtoi se Policia e Shtetit po zbaton pjesën e këtij plani veprimi që përfshin rekomandimet që janë objekt i punës së policisë.

Prezantimet e Grupeve të Punës të Konsorciumit Ndërkombëtar për çështje kyçe që lidhen me zbatimin e prioriteteve të Planit të Veprimit, u moderuan nga zv.Kryetari i Prezencës së OSBE-së në Shqipëri, Dan Redford dhe paraqiten situatën në lidhje me: Imuniteti Kushtetues dhe Reforma e Kodit të Procedurës Penale - përparimi drejt aderimit në BE; Hetimi, identifikimi dhe sekuestrimi i pasurive që rrjedhin nga veprimtari kriminale; Përmirësimi i kapaciteteve profesionale dhe logjistike të Drejtorisë për Mbrojtjen e Dëshmitarëve’ Forcimi i të drejtave të të miturve dhe ulja e kohës së ndalimit; Trajtimi i të ndaluarve me probleme të shëndetit mendor në sistemin penitenciar; Roli i trajnimit të Policisë së Shtetit në adresimin e rekomandimeve të Opinionit të KE-së për Shqipërinë; Përmirësimi kulturës së menaxhimit, faktor kyç në zbatimin e suksesshëm të filozofisë së Policimit në Komunitet; Qendra Ndërinstitucionale Operacionale Detare (QNOD) - Bashkëpunimi, Angazhimi Financiar dhe Metrika - përparimi dhe përdorimi i Teknologjisë së Informacionit në mbështetje të objektivave të aderimit në BE. Në këtë mbledhje u diskutua edhe për sfidat e ardhshme të bashkërendimit të donatorëve në këtë sektor, roli i Konsorciumit dhe riorganizimi i grupeve të punës të Konsorciumit. Mbledhja vjetore për vitin 2011 u bashkëfinancua nga Policia e Shtetit, Prokuroria e Përgjithshëm dhe ICITAP-Departamenti i Drejtësisë i SHBA-së.