Qeveria shqiptare dhe Kombet e Bashkuara nënshkruajnë Programin e ri të Bashkëpunimit

Photo: Foto: Koordinatorja e Përhershme e OKB-së, znj. Zineb Touimi-Benjelloun dhe Kryeministri i Shqipërisë, z. Sali Berisha, gjatë ceremonisë së nënshkrimit të programit të ri të bashkëpunimit për periudhën 2012-2016

Më 24 tetor 2011, Qeveria e Shqipërisë dhe Kombet e Bashkuara shënuan një hap të rëndësishëm përpara duke nënshkruar programin e ri të bashkëpunimit për periudhën 2012-2016. Programi i ri i kryesuar nga Qeveria shqiptare dhe i bazuar në pikat e forta të 20 agjencive pjesëmarrëse, programeve dhe fondeve të OKB-së, mbështet prioritetet kombëtare dhe sfidat zhvillimore të Shqipërisë në fushat e qeverisjes, shtetit të së drejtës, ekonomisë dhe mjedisit, zhvillimit rajonal e vendor dhe politikave të përfshirjes sociale. Programi mbështet Shqipërinë për të ecur përpara me Agjendën e saj të Integrimit Europian. Programi është fryt i konsultimeve të gjera me një sërë partnerësh si institucionet qendrore, shoqëria civile dhe shumë të tjera. Programi mbështetet te përvoja e fituar nga programi i mëparshëm Një OKB dhe thellon operacionet e OKB-së me qëllim që reformat t'i përgjigjen më me efikasitet prioriteteve kombëtare.

Gjatë fjalës së rastit, kryeministri i Shqipërisë, z. Sali Berisha, theksoi se: “Programi në pjesë vitet e ardhshme do të përqendrohet për të ndihmuar Shqipërinë në promovimin e një modeli për zhvillimin e qëndrueshëm. ‘Shqipëria, vend i zhvilluar’ është qëllimi madhor dhe ëndrra më e bukur e çdo shqiptari. Kemi të gjitha potencialet për të ndjekur këtë rrugë në interes të të gjithë shqiptarëve”.

Marrëveshjen e nënshkroi Ministri për Inovacionin dhe Teknologjinë e Informacionit e të Komunikimit, z. Genc Pollo, i cili u shpreh se: Qeveria shqiptare e vlerëson veçanërisht vizionin e ri që ka sjellë nisma “Delivering as One”, që ka rritur koherencën dhe bashkëpunimin mes agjencive të OKB-së dhe homologëve kombëtare, duke garantuar zotërimin e plotë të qeverisë në zbatimin e kësaj nisme. Programi i ri është një kuadër gjithëpërfshirës i mbështetjes së OKB-së për prioritetet kombëtare të Shqipërisë dhe përfaqëson një hap përpara në procesin e reformave të OKB-së”. Znj. Zineb Toumi- Benjelloun e cila nënshkroi marrëveshjen në emër të OKB-së u shpreh se: “Programi pasqyron angazhimin e përbashkët për të arritur rezultate dhe për t'i shërbyer më mirë popullit shqiptar”.

Programi Një OKB në Shqipëri përfshin agjenci rezidente dhe jorezidente, fonde dhe programe të OKB-së që kontribuojnë strategjikisht për realizimin e prioriteteve zhvillimore të Shqipërisë, konkretisht: Fondi i OKB-së për Fëmijët (UNICEF), Programi për Zhvillim i OKB-së (UNDP), Fondi i Kombeve të Bashkuara për Popullsinë (UNFPA), Programi i Përbashkët i OKB-së për HIV/AIDS (UNAIDS), Vullnetarët e OKB-së (UNV), Organizata e OKB-së për Barazinë Gjinore dhe Fuqizimin e Grave (UN Women), Komisioneri i Lartë për Refugjatët i OKB-së (UNHCR), Organizata Ndërkombëtare e Punës (ILO), Organizata Botërore e Shëndetësisë, Organizata Ndërkombëtare për Migrimin (IOM) dhe agjencitë jorezidente: Programi i OKB-së për Mjedisin (UNEP), Organizata e OKB-së për Arsim, Shkencë dhe Kulturë (UNESCO), Organizata e Ushqimit dhe Bujqësisë (FAO), Konferenca e OKB-së për Tregtinë dhe Zhvillimin (UNCTAD), Zyra e OKB-së kundër Drogës dhe Krimit (UNODC), Agjencia Ndërkombëtare e Energjisë Atomike (IAEA), Fondi Ndërkombëtar për Zhvillimin Bujqësor (IFAD), Qendra Ndërkombëtare e Tregtisë (ITC), Organizata e OKB-së për Zhvillimin Industrial (UNIDO) dhe Komisioni Ekonomik i OKB-së për Evropën (UNECE).